Сегодня:

19 января 2018 г.
( 6 января ст.ст.)
пятница.

Крещение Господне.

Седмица 33-я по Пятидесятнице.
Глас 7.

Поста нет.

Святое Богоявление. Крещение Господа Бога и Спаса нашего Иисуса Христа.
Преставление свт. Феофана , Затворника Вышенского (1894).


Утр. - Мк., 2 зач., I, 9-11. Лит. - Тит., 302 зач., II, 11-14; III, 4-7. Мф., 6 зач., III, 13-17. На освящении воды: 1 Кор., 143 зач. (от полу́), X, 1-4. Мк., 2 зач., I, 9-11.

Цитата дня

Кого мир обманул? Кто к нему привязался.

А кого Бог спас? Кто на Него полагался.

Архим. Кирилл (Павлов).

Православное христианство.ru. Каталог православных ресурсов

Акафист Пресвятой Богородице пред иконами Ее «Взыскание погибших» и «Всех скорбящих Радость»

 

d001

 

Кондак 1

Взбранней Воеводе победительная, яко избавльшеся от вечныя смерти благодатию от Тебе рождшагося Христа Бога нашего и Твоим Матерним пред Ним ходатайством, благодарственная восписуем Ти, раби Твои: яко имущая державу непобедимую, от всяких нас бед и скорбных обстояний свободи, зовущих:

Радyйся, Благодатная Богородице Дево, погибших Взыскание и всех скорбящих Радосте.

Икос 1

Ангел предстатель послан бысть с Небесе рещи Богородице: «Радуйся, Благословенная в женах, предреченная Мати Христа, Сына Божия». Темже и мы, грехми обремененнии, надежду спасения в Тебе улучивше, умильно взываем Ти:

Радyйся, Божие ко грешным благоволение; Радуйся, кающихся пред Господем Богом крепкое заступление.

Радyйся, падшаго Адама воззвание; Радуйся, слез Евиных избавление.

Радyйся, греховную отъемлющая скверну; Радуйся, бане, омывающая совесть.

Радyйся, рождшая Избавителя, беззакония наша милостиво очищающаго; Радуйся, всечудное всех к Богу примирение.

Радyйся, мосте, воистину преводяй нас от смерти к животу; Радуйся, мир от потопа греховнаго спасшая.

Радyйся, лествице небесная, еюже Господь к нам сниде; Радуйся, вина всех обожения.

Радyйся, Благодатная Богородице Дево, погибших Взыскание и всех скорбящих Радосте.

 

Кондак 2

Видяще токи чудес, изливаемыя от святыя Твоея иконы, Благая Богородительнице, и разумеюще, яко Ты еси молящихся Благая Помощница, обидимых Заступница, ненадеющихся надежда, печальных утешение, погибших Взыскание, алчущих Кормительница, нагих одеяние, девственных целомудрие, странных Наставница, труждающихся помощь, слепых прозрение, глухих благослышание, больных исцеление, благодарственне вопием о Тебе Богу: Аллилуиа.

Икос 2

Тайну Твоего, Богородице, заступления людей, в скорби погибающих, уразумети хотяще, к Тебе прибегаем, о Мати и Дево. Ты же, яко Благая, научи ны разумети в защищении Благаго Сына Твоего милосердое промышление о спасении душ наших и очищение многих согрешений, да взываем Ти радостно:

Радyйся, обуреваемых тихое пристанище; Радуйся, сумнящихся известное утверждение.

Радyйся, Едина Мати милосердия; Радуйся, скорая Помощнице сущим в бедах и напастех.

Радyйся, скорбьми грехи наша очищающая; Радуйся, печалию наши немощи душевныя врачующая.

Радуйся, суетныя радости презирати нас научающая; Радуйся, к вышнему миру ум наш возводящая.

Радyйся, от любве земныя к Небесней Божией любви нас привлекающая; Радуйся, в самых страданиих наших утешение и благодатную жизнь нам подающая.

Радyйся, Радуйся, обетование благ вечных; Радуйся, Ходатаице вечныя радости.

Радyйся, Благодатная Богородице Дево, погибших Взыскание и всех скорбящих Радосте.

 

Кондак 3

Силою свыше укрепи мя, Благая Владычице, недугующа телом и душею, и посещения Твоего сподоби и промышления, мрак уныния и скорби, облежащии мя, отгоняющи, да, спасаемый Тобою, присно воспою Богу: Аллилуиа.

Икос 3

Имущи богатство милосердия неизреченное, всем скорбящим руку помощи простираеши, недуги врачующи, страсти исцеляющи. Не презри и мене, Благая Владычице, на одре немощи моея низлежаща и вопиюща Ти:

Радyйся, милости сокровище многоценное; Радуйся, отчаянных едина надеждо.

Радyйся, тела моего врачевание; Радуйся, души моея спасение.

Радyйся, твердая крепосте немощных; Радуйся, изнемогающих Заступнице и укрепление.

Радyйся, гнев Божий Твоим молением скоро утоляющая; Радуйся, страсти наша силою молитв Твоих укрощающая.

Радyйся, слепых зрение, глухих слышание; Радуйся, хромых хождение, немых глаголание.

Радyйся, болящих благонадежное посещение; Радуйся, яко Тобою, по мере веры, подаются благодатная исцеления всем немощствующим.

Радyйся, Благодатная Богородице Дево, погибших Взыскание и всех скорбящих Радосте.

 

Кондак 4

Буря многих бед и напастей обдержит мя, и волнения уже не терплю. Ты же, яко Милостивая Мати Спаса моего и Бога, воздвигни руце к Сыну Твоему, молящи Его, да призрит на лютую скорбь сердца моего и воздвигнет мя из пучины отчаяния, вопиющаго Ему: Аллилyиа.

Икос 4

Слышащи, Пресвятая Дево и Мати, Симеона праведнаго проречение: «Тебе же Самой душу пройдет оружие», слагала еси в сердце Твоем вся глаголы сия, разумевающи, яко радость матерняго сердца о чадех многих печалей в мире сем бывает причастна. Темже, яко искушенней по всяческим и спострадати матерней скорби, могущей, взываем Ти:

Радyйся, радость миру — Христа Спасителя рождшая; Радуйся, мир от скорбей избавляющая.

Радyйся, хуления и клеветы Сына Твоего терпевшая; Радуйся, страданием Его спострадавшая.

Радyйся, скорбных матерей утешение; Радуйся, чад их благодатное охранение.

Радyйся, в бедах скорое нам заступление; Радуйся, заблуждших исправление.

Радyйся, младенцев питание; Радуйся, юных наставление.

Радyйся, Мати сиротствующих, Радуйся, вдов заступление.

Радyйся, Благодатная Богородице Дево, погибших Взыскание и всех скорбящих Радосте.

 

Кондак 5

Боготочную Кровь Сына Твоего на Кресте за спасение наше изливаемую зрящи, яко Раба Господня, повинующися воли Отца, Иже на Небесех, нам образ злострадания и терпения явила еси, да и мы, в пещи искушений и бед сущии, вопием смиренно Богу: Аллилyиа.

Икос 5

Видя Тя Сын Твой и Бог, при Кресте стоящую с возлюбленным учеником и сердцем Ему сраспинающуюся, глаголаше: «Жено, се, сын Твой», и ученику: «Се, Мати твоя», всыновляя Тебе вся верующия в Него. Мы же, яко общницы скорби и страданий Сына Твоего, имеюще в Тебе Благую Матерь, на Тя все упование в скорби возлагающе, вопием Ти:

Радyйся, Мати рода христианскаго; Радуйся, усыновившая нас при Кресте Сына Твоего.

Радyйся, Бога с человеки соединившая; Радуйся, верных Господеви сочетавшая.

Радyйся, Агнице, рождшая Агнца, вземшаго грехи мира; Радуйся, чаше, черплющая нам радость от Источника безсмертия.

Радyйся, Споручнице спасения грешных; Радуйся, Взыскание погибших.

Радyйся, нечаянная грешных Радосте; Радуйся, падших возстание.

Радyйся, Целительнице всех немощей; Радуйся, утоление всякия печали.

Радyйся, Благодатная Богородице Дево, погибших Взыскание и всех скорбящих Радосте.

 

Кондак 6

Проповедуют милости Твоя, Богомати, вси концы вселенныя, ибо честным покровом Твоим покрывавши весь род христианский, о нем же присно молишися Христу Спасителю нашему и избавляеши от всех бед благонравныя и богобоящияся люди Твоя, верно вопиющия Богу: Аллилyиа.

Икос 6

Возсия благодать светозарны от пречудныя иконы Твоея, Богомати, пред нею же со слезами припадающе, молим Ти ся: отжени облак нашедших на ны искушений, да вопием Ти радостно:

Радyйся, приносящая к Сыну Твоему и Богу моления верных; Радуйся, и Сама у Престола Сына Твоего присно молящаяся о нас.

Радyйся, Предстательнице к Богу, мир от бед спасающая; Радуйся, Заступнице рода христианскаго, от Бога нам дарованная.

Радyйся, древо благосеннолиственное, имже покрываются мнози; Радуйся, древо светлоплодовитое, имже питаются вернии.

Радyйся, покрове миру, ширший облака; Радуйся, земле обетования, из нея же течет мед и млеко.

Радyйся, ниво, растящая обилие щедрот; Радуйся, Подательнице всякия благости.

Радyйся, Благодатная Богородице Дево, погибших Взыскание и всех скорбящих Радосте.

 

Кондак 7

Хотящи явити токи чудес от святыя иконы Твоея «Взыскание погибших», повелела еси, Владычице, в погибели и печали сущим молебная пения пред тою совершати и получившим исцеление — проповедати милости, ради тоя иконы явленныя, да не сокрыт будет источник благодатных врачеваний всем требующим. Темже и мы не таим Твоих благодеяний, но благодарственно прославляюще Бога, вопием Ему: Аллилyиа.

Икос 7

Новая купель Силоамская паче оныя древния явися, Пречистая Владычице, храм Твой, в немже поклоняемся чудотворней иконе Твоей: ибо не единою в лето и токмо первее входящим здравие тела подаеши, но всякий недуг и всякую язву душевную и телесную врачуеши с верою и любовию к Тебе прибегающих. Сего ради вопием Ти:

Радyйся, купель, в нейже вся скорби наша погружаются; Радуйся, чаше, еюже радость и спасение восприемлем.

Радyйся, каменю, напаяющий жаждущия жизни; Радуйся, древо, услаждающее сланыя воды житейскаго моря.

Радyйся, животворныя воды неистощимый Источниче; Радуйся, бане, омывающая греховную скверну.

Радyйся, скорбей наших услаждение; Радуйся, печалей наших утоление.

Радyйся, демонов попрание; Радуйся, врагов посрамление.

Радyйся, Благодатная Богородице Дево, погибших Взыскание и всех скорбящих Радосте.

 

Кондак 8

Странники и пришельцы вси есмы на земли сей, по глаголу апостолову: беды от врагов, беды от сродник, беды от лжебратии терпяще в лишениих многих и скорбех. Ты же, Владычице, яко Благая Путеводительница, настави нас к тихому пристанищу и моли Сына Твоего прощению прегрешений нам прежде конца дароватися, да присно вопием Богу: Аллилyиа.

Икос 8

Все житие наше на земли болезненно и печали исполнено от клеветы, досаждения, укорения и иных многовидных бед и напастей, немощствует бо тело, изнемогает и дух наш. К Тебе убо прибегаем, Богомати, пред пречистою иконою Твоею припадающе, исполни радости и веселия скорбная сердца наша, да вопием Ти:

Радyйся, Путеводительнице, к Небесному отечеству нас руководящая; Радуйся, Царице Неба и земли, врата райская нам отверзающая.

Радyйся, Милостивная, нас милующая; Радуйся, Домостроительнице, житие наше добре устрояющая.

Радyйся, руно орошенное, еже Гедеон предвиде: Радуйся, блаженное чрево, невместимаго всеми Бога вместившее.

Радyйся, Неопалимая Купино; Радуйся, Нерушимая Стено.

Радyйся, Живоносный Источниче; Радуйся, Цвете Неувядаемый. Радуйся, умягчение сердец злых; Радуйся, умиление благих.

Радyйся, Благодатная Богородице Дево, погибших Взыскание и всех скорбящих Радосте.

 

Кондак 9

Всякая житейская в мире сем сладость печали бывает причастна: слава не стоит, богатство мимотечет, лепота и здравие увядают, друзи и искреннии смертию отъемлются. Услади убо наша скорби, благих Виновная, Твою нетленную дающи радость нам, вопиющим Богу: Аллилyиа.

Икос 9

Ветия многовещанныя недоумеют, киими словесы скорбящия и погибающия утешати, но Сама, Владычице, возглаголи сердцам нашим утешение, благодати Твоея лучами облак скорби нашея и мрак уныния разгоняющи, да взываем Ти:

Радyйся, обрадовавшая надеянием на Тя всех христиан; Радуйся, Радосте и умирение миру.

Радyйся, Подательнице Божественныя благости; Радуйся, Надеждо благ вечных.

Радyйся, кораблю хотящих спастися; Радуйся, пристанище житейских плаваний.

Радyйся, верная Хранительнице уповающих на Тя по Бозе; Радуйся, одеждо нагих дерзновения.

Радyйся, Хранительнице всех и утверждение; Радуйся, всех верных ограждение и священное прибежище.

Радyйся, помоще верно молящихся Тебе; Радуйся, светлое благодати познание.

Радyйся, Благодатная Богородице Дево, погибших Взыскание и всех скорбящих Радосте.

 

Кондак 10

Спасти хотяй род человеческий от вечныя муки и непрестающия скорби, Человеколюбец Господь в приснодевственную утробу Твою вселися, и Тебе, Матерь Свою, дарова погибающим в помощь, покров и защищение, да будеши печальным утешение, погибшим взыскание, скорбящим радование, отчаянным надежда, вечныя муки Своим ходатайством избавляющая и к Небесному веселию приводящая всех, верно вопиющих Сыну Твоему и Богу нашему: Аллилyиа.

Икос 10

«Стена еси девам, Богородице Дево, и всем к Твоему покрову прибегающим. Темже молим Тя, заступи, покрый и соблюди всех погибающих и безпомощных от искушений, озлоблений и бед, Тебе с любовию взывающих:

Радyйся, столпе девства; Радуйся, чистоты и целомудрия сосуде избранный.

Радyйся, воинствующим на плоть целомудрием изрядное венчание; Радуйся, во иночестве благоскорбящим Подательнице вечнаго радования.

Радyйся, пламень страстей изменяющая; Радуйся, мрак искушений прогоняющая.

Радyйся, Наставнице целомудрия; Радуйся, чистоты ограждение.

Радyйся, человеков исправление; Радуйся, Еюже от падения нашего возстахом.

Радyйся, твердое веры утверждение; Радуйся, приятное молитвы кадило.

Радyйся, Благодатная Богородице Дево, погибших Взыскание и всех скорбящих Радосте.

 

Кондак 11

Пение всеумиленное приносим Ти, раби Твои, Богородице, яко всесильней Заступнице рода нашего: утоли болезни к Тебе прибегающих, укроти гнев Божий, праведно на ны движимый грех ради наших, избави нас от всякия лютыя скорби и погибели, вопиющих о Тебе Богу: Аллилyиа.

Икос 11

Светоприемная свеща, углем благодати Божия возжженная, явися нам пречестная икона Твоя, Владычице, на освящение наше и утешение. Мы же, любовию чтуще и с верою припадающе к ней, вопием Ти:

Радyйся, Радуйся, сильным Твоим заступлением от всех бед нас избавляющая; Радуйся, от труса и потопа нас защищающая.

Радyйся, от глада душевнаго и телеснаго нас снабдевающая; Радуйся, огнь росою молитв Твоих угашающая.

Радyйся, от смертнаго губительства нас спасающая; Радуйся, в бранех крепкая Помощнице.

Радyйся, от нашествия иноплеменных нас ограждающая; Радуйся, от междоусобныя брани охраняющая.

Радyйся, плавающих легкое по водам прохождение; Радуйся, путешествующих добрая Водительнице.

Радyйся, пленных свобождение; Радуйся, от належащаго праведнаго прещения Божия скорое избавление.

Радyйся, Благодатная Богородице Дево, погибших Взыскание и всех скорбящих Радосте.

 

Кондак 12

Благодати залог восхотевши дати роду нашему, цельбоносную икону Твою явила еси нам, Богомати, от неяже токи чудес с верою приходящим источаются, недузи врачуются и скорби утоляются. Сего ради радостно о Тебе вопием Богу: Аллилyиа.

Икос 12

Поюще Твоя милости и чудеса, Богородительнице, хвалим Тя вси, яко твердую Предстательницу нашу, и со умилением поклоняемся Тебе, молящейся о нас, и просим: воздвигни руце к Сыну Твоему, да в сей жизни и по смерти нашей милосердие Его неотступно будет о нас, взывающих Ти:

Радyйся, непостыдное наше упование в житии и по преставлении нашем; Радуйся, уповающим на Тя мирен конец жития сего подающая.

Радyйся, в день судный наша Надеждо и Защищение; Радуйся, Судии Праведнаго умоление.

Радyйся, геенны вечныя избавление: Радуйся, Надеждо вечнаго спасения.

Радyйся, ключу Царствия Христова; Радуйся, двере райская.

Радyйся, мосте, к Небесем преводяй; Радуйся, всех кающихся грешников прибежище и Благая Заступнице.

Радyйся, Ангелов Радосте; Радуйся, всех праведных Славо и Утешение.

Радyйся, Благодатная Богородице Дево, погибших Взыскание и всех скорбящих Радосте.

 

Кондак 13

О Всепетая Богообрадованная Мати, рождшая на радость Небу и земли Царя Христа, Бога нашего! Услыши глас скорбящих раб Твоих и, приемши сие малое моление наше, избави нас от всяких бед, скорбей и напастей: недуги наша исцели, напрасныя клеветы потреби, всяку злобу и вражду отжени от нас и будущия изми муки о Тебе вопиющих: Аллилyиа.

(Этот кондак читается тpижды, затем 1-й икос «Ангел предстатель...» и 1-й кондак «Взбранней Воеводе...»).

 

 dec3l

Молитва ко Пресвятой Богородице

О Пресвятая и Преблагословенная Дево, Владычице Богородице! Призри милостивным Твоим оком на нас, предстоящих пред святою иконою Твоею и со умилением молящихся Тебе; воздвигни нас из глубины греховныя, просвети ум наш, омраченный страстьми, и уврачуй язвы душ и телес наших. Не имамы иныя помощи, не имамы иныя надежды, разве Тебе, Владычице. Ты веси вся немощи и согрешения наша, к Тебе прибегаем и вопием: не остави нас Твоею небесною помощию, но предстани нам присно и Твоим неизреченным милосердием и щедротами спаси и помилуй нас, погибающих. Даруй нам исправление греховныя жизни нашея и избави нас от скорбей, бед и болезней, от внезапныя смерти, ада и вечныя муки. Ты бо, Царице и Владычице, скорая помощница и заступница еси всем притекающим к Тебе и крепкое прибежище грешников кающихся. Подаждь убо нам, преблагая и всенепорочная Дево, христианский конец жития нашего мирен и непостыден и сподоби нас твоим ходатайством вселитися в обителях небесных, идеже непрестанный глас празднующих радостию славит Пресвятую Троицу, Отца и Сына и Святаго Духа, ныне и присно и во веки веков. Аминь.

 

Молитва вторая

Заступнице усердная, благоутробная Господа Мати, к Тебе прибегаю аз, окаянный и паче всех человек грешнейший; вонми гласу моления моего, вопль мой и стенание услыши. Яко беззакония моя превзыдоша главу мою, и аз, якоже корабль в пучине, погружаюся в море грехов моих. Но Ты, всеблагая и милосердная Владычице, не презри мене, отчаяннаго и во гресех погибающаго; помилуй мя, кающагося в злых делех моих, и обрати на путь правый заблуждшую окаянную душу мою. На Тебе, Владычице моя Богородице, возлагаю все упование мое. Ты, Мати Божия, сохрани и соблюди мя под кровом Твоим, ныне и присно и во веки веков. Аминь.

 

Молитва третья

О Пресвятая Владычице и Богородице, вышшая Херувим и честнейшая Серафим, Богоизбранная Отроковице, погибших Взыскание и всех скорбящих Радосте! Подаждь утешение и нам, в погибели и скорби сущим; разве бо Тебе иного прибежища и помощи не имамы. Ты едина еси радости нашея ходатаица, и яко Матерь Божия и Мати милосердия, предстоящи у Престола Пресвятыя Троицы, можеши нам помощи, никто же бо притекаяй к Тебе посрамлен отходит. Услыши убо и нас ныне в день погибели и печали пред Твоею иконою припадающих и со слезами Тебе молящихся: отжени от нас належащия на нас скорби и беды в сей временней жизни, не лишены же нас сотвори Твоим всесильным ходатайством и вечныя нескончаемыя радости в Царствии Сына Твоего и Бога нашего. Аминь.